Tədbir dövlət qurumlarının, maliyyə sektorunun, diplomatik korpusun və biznes dairələrinin nümayəndələrini bir araya gətirib. Müzakirələrin əsas mövzuları Azərbaycanın investisiya cəlbediciliyi, dövlət dəstəyi mexanizmləri, vergi güzəştləri, ESG gündəliyi və region iqtisadiyyatının inkişafında iri miqyaslı inkişaf təşəbbüslərinin rolu olub.

AZPROMO-nun icraçı direktoru Yusif Abdullayev cari iqtisadi tendensiyalara dair icmal təqdim edib və beynəlxalq investorlar üçün mövcud imkanlardan danışıb.

ABB İdarə Heyəti sədrinin müavini Elmir Həbibullayev çıxışında Azərbaycanın infrastrukturunun beynəlxalq biznes üçün üstünlüklərini vurğulayıb və Azərbaycan ilə Rusiya arasında işgüzar əlaqələrin möhkəmləndirilməsi potensialını qeyd edib. 

Rusiya Federasiyasının Azərbaycan Respublikasındakı fövqəladə və səlahiyyətli səfiri Mixail Yevdokimov iki ölkə arasında regional sabitlik, sənaye kooperasiyası, turizm və humanitar əməkdaşlıq məsələlərinə toxunub. O, həmçinin turist axınının bundan sonra da artacağına əminliyini ifadə edib: “Biz hesab edirik ki, artıq gələn il və ya yaxın illərdə Azərbaycana hər il səfər edən rusiyalı turistlərin sayını bir milyon nəfərə çatdıra biləcəyik”. 

Azərbaycan-Rusiya İşgüzar Şurasının sədri, Agalarov Development-in prezidenti və Sea Breeze-in təsisçisi Emin Ağalarov kurort ərazisində həyata keçirilən layihələri təqdim edib, həmçinin Sea Breeze-in investisiya cəlbediciliyini formalaşdıran amillər və Azərbaycan sahilinin potensialı barədə danışıb.