Sankt-Peterburq Beynəlxalq İqtisadi Forumu çərçivəsində ikitərəfli əməkdaşlığın inkişafına, investisiya əlaqələrinin genişləndirilməsinə və iqtisadiyyatın əsas sahələrində birgə layihələrin həyata keçirilməsinə həsr olunmuş “Rusiya – Azərbaycan” biznes dialoqu keçirilib.
Müzakirələrdə Agalarov Development şirkətinin prezidenti, Azərbaycan-Rusiya İşgüzar Şurasının İdarə Heyətinin sədri Emin Ağalarov, Rusiya Federasiyasının xarici işlər nazirinin müavini Mixail Qaluzin, Rusiya-Ərəb İşgüzar Şurasının sədri Sergey Qorkov, Azərbaycan-Rusiya İşgüzar Şurasının icraçı direktoru Yuri Danilov, “Transmaşholdinq” ASC-nin baş direktoru Kirill Lipa, Azərbaycan Respublikasının Rusiya Federasiyasındakı fövqəladə və səlahiyyətli səfiri Rəhman Mustafayev, VTB Bankın vitse-prezidenti, prezidentin müşaviri və İdarə Heyətinin sədrinin müşaviri Gülnarə Rəhimova-Deniz iştirak ediblər. Sessiyanın moderatoru qismində Rusiya Hüquqşünaslar Assosiasiyası İdarə Heyətinin sədr müavini Stanislav Aleksandrov çıxış edib.
İştirakçılar qeyd ediblər ki, davam edən geosiyasi qeyri-sabitliyə baxmayaraq, Rusiya-Azərbaycan münasibətləri sabit müsbət dinamika nümayiş etdirməkdə davam edir. Müzakirələrin əsas mövzuları qarşılıqlı ticarətin inkişafı, investisiya əməkdaşlığı, sənaye kooperasiyası, nəqliyyat infrastrukturu, eləcə də turizm, təhsil, səhiyyə və şəhərsalma sahələrində əməkdaşlıq olub.
Rusiya Federasiyasının xarici işlər nazirinin müavini Mixail Qaluzin bildirib ki, Moskva Bakı ilə münasibətlərin daha da inkişaf etdirilməsinə prinsipial şəkildə sadiqdir. Onun sözlərinə görə, Rusiya-Azərbaycan əməkdaşlığı geniş istiqamətlər üzrə ardıcıl şəkildə inkişaf edir və regional tərəfdaşlığın mühüm elementlərindən biri olaraq qalır. O, həmçinin Emin Ağalarova iki ölkə arasında mədəni əlaqələrin inkişafına verdiyi töhfəyə və Azərbaycanda rusiyalı sənətçilərin iştirakı ilə keçirilən irimiqyaslı tədbirlərin təşkilinə görə təşəkkür edib.
Azərbaycan Respublikasının Rusiya Federasiyasındakı fövqəladə və səlahiyyətli səfiri Rəhman Mustafayev vurğulayıb ki, iki dövlət arasındakı münasibətlər fəal inkişaf və möhkəmlənmə mərhələsindədir. Onun sözlərinə görə, ikitərəfli dialoqun genişlənməsi müsbət siqnal olmaqla yanaşı, gələcək əməkdaşlıq üçün mühüm tendensiyadır. Diplomat humanitar və təhsil sahəsində əlaqələrdən danışaraq qeyd edib ki, hazırda Rusiyanın ali təhsil müəssisələrində Azərbaycandan olan təxminən 8 min tələbə təhsil alır.
Müzakirələr zamanı biznesin ikitərəfli tərəfdaşlığın əsas hərəkətverici qüvvəsi kimi roluna xüsusi diqqət yetirilib. Çıxışçılar birgə layihələr üçün yeni inkişaf nöqtələrini, ölkələr arasında ticarət dövriyyəsinin daha da artırılması tədbirlərini və Rusiya ilə Azərbaycan şirkətlərinin bir-birinin bazarlarında iştirak imkanlarının genişləndirilməsini müzakirə ediblər.
Emin Ağalarov iştirakçılara məzmunlu çıxışlarına görə təşəkkürünü bildirib və qeyd edib ki, özəl biznesin fəal iştirakı, birgə təşəbbüslərin inkişafı və qarşılıqlı investisiya marağının artması sayəsində Rusiya ilə Azərbaycan arasında əməkdaşlıq keyfiyyətcə yeni mərhələyə yüksəlir. Sessiya zamanı o, həmçinin Sea Breeze şəhər-kurortunun inkişafının əsas istiqamətlərini təqdim edib.
“Azərbaycanda rusiyalılara böyük rəğbət və qonaqpərvərlik göstərilir. Mən səmimi qəlbdən inanıram ki, Azərbaycanla Rusiya arasında pis münasibətlər ola bilməz. Ölkələrimiz arasındakı münasibətlər sadəcə yaxşı deyil, çox yaxşı olmalıdır. Bu il Sea Breeze-də keçiriləcək Dream Fest festivalına Rusiyadan 50-dən çox sənətçi qatılacaq. Bu, ölkələrimiz arasında humanitar əlaqələrin möhkəmlənməsinin yalnız bir nümunəsidir. Bu gün Sea Breeze ərazisində 3,5 milyon kvadratmetrdən çox yaşayış və kommersiya daşınmaz əmlakı inşa edilib, burada 50 mindən artıq insan yaşayır. Layihə təkcə iqtisadiyyat və investisiyalar üçün inkişaf mühərriki deyil, həm də Rusiya ilə Azərbaycan arasında mədəni və işgüzar əməkdaşlığın inkişafı üçün platformaya çevrilir”, – deyə Emin Ağalarov bildirib.
Sessiya iştirakçılarının fikrincə, sənaye, nəqliyyat, logistika, inkişafetdirmə (devloperlik), təhsil, turizm və maliyyə sektorlarında əməkdaşlığın daha da genişləndirilməsi üçün əhəmiyyətli potensial mövcuddur. İşgüzar əlaqələrin möhkəmləndirilməsində iri infrastruktur layihələri xüsusi rol oynayır. Bu layihələr biznes üçün yeni imkanlar yaradır və hər iki ölkənin iqtisadi inkişafına töhfə verir.